中山美食游嘅为食兵团一听到石岐佬有“新岐试”，就即刻嗱嗱淋拉大队过嚟“抢”番个靓位先！

之所以话要“抢”位，讲得一D都冇花假架！石岐佬至从取消咗订位之后，就係“先到先得，迟到要等得”，五点半钟都未够咋，等位果D已经排晒长龙排到出门口啦！好彩我地“中山美食游”一早就嚟“抢”咗个好位啫！

真系人山人海、座无虚席。相信有好嘢先会有咁多人支持！

哩度大大话话都有两百几张台架，有“船仔”、有“雀笼”、仲有好多好亲切嘅“石岐街”房添！我呢就最中意坐“船仔”食饭啦，够晒气氛吖嘛！唔知大家嚟到石岐佬又会中意坐边度呢？

等咗一阵，就已经出餸啦！果然快手快脚，唔怪得个厨房咁大啦！咁多客人都可以保证出餸嘅速度，係值得赞下嘅！

奇味大白菜丝

哩个菜係用咗川菜嘅做法，将大白菜生切成丝，捞埋D红油之后：麻！辣！香！菜丝仲好脆口添，可以讲係川式沙律，又真系几“新岐”啵！

乾坤猪肚

叫得乾坤猪肚，内里肯定另有乾坤啦！原来入面装咗白果、雪耳、木耳、冬菇等材料，都几健康架！猪肚煲到好淋，里面嘅材料又吸收晒D精华，吃落好香，D汁嘅胡椒味我就觉得啱啱好，唔怕辣，用来捞饭好正！

泡椒田鸡

哩味菜又系川式做法啵，见到红卜卜唔知会唔会好辣呢？吃落又几野味呙，唔怕话好辣，但系绝对刺激到味蕾！唔错唔错，辣得几过瘾！

椒盐山坑鱼VS青瓜饼

哩两味菜放埋一齐又几有意思啵，超哥仲帮佢改咗个名叫“鱼游岐江”，江边仲铺满“绿草”架！

讲番D山坑鱼先，椒盐香口，连骨都食埋。依加D山坑鱼仲有好多鱼春添，我觉得好似D多春鱼咁好食，估唔到中山嘅山坑鱼仔咁正架！无论係从个鱼头食起定係从个鱼尾食起又或者係从个鱼身食起，都咁脆！

到哩个青瓜饼啦，看上去就知道落咗不少功夫去整啦，切到条条瓜丝都咁均匀，块块大细都咁适中，卖相已经好吸引！咬落去第一感觉都係好脆，原来係加咗花生粒香煎过。再咬下，烟烟韧韧咁，好Q吖！脆、软、滑、糯，一个菜可以有咁多仲口感，今次真係大饱口福咯！

顺气黑椒鱼腩

哩味菜都仲未上台咋，已经闻到香喷喷啦！胀卜卜嘅锡纸包住D咩呢？真係吊人胃口！用筷子笃穿，香味仲浓吖！D鱼腩睇到都流晒口水！当然要趁热食啦！

原来哩个菜嘅灵感係来至“中山慈善万人行”嘅锡纸气球，取名为“顺气”係因为只要用筷子笃穿，入面嘅蒸气就会散晒也来，如果遇到D激气事，食哩味菜就咩气都顺晒啦！有意思！菜除咗可満足食欲之外，仲识得善解人意，食落个人都开心D啦！

瑶池白玉

瑶池係皇母娘娘宴请众仙嘅地方，叫得哩个名，个菜一定有番咁上下！有瑶柱、节瓜丝、鲍汁整成嘅“瑶池白玉”就好似一碗翅咁！虽然唔係咩名贵嘅材料，但厨师将“不时不食”哩个饮食之道发挥得淋漓尽致！本地节瓜依加正合“路”，消暑解气，大热天食番个咁嘅菜，妙哉！

御汤鲩鱼片

脆肉鲩系中山特有嘅鱼种，好食程度已经出晒名啦！哩个御汤清得来又够鲜，连汤都饮埋咯！

水陆混沌豆腐

水，代表虾；陆，代表猪肉；混沌，即系捞埋一齐，哩个豆腐虽然唔似得客家豆腐咁有来头，但绝对係石岐人中意嘅味道！豆腐煮得又啱火候，滑漉漉，汁又浓，最重要係，哩味菜好有亲切感！

经过一番“新岐试”，中山美食游今集又满载而归啦！

石岐真係一个美食荟萃嘅地方，连香港食神梁文韜都经常来石岐“揾食”！唔讲你唔知，原来哩位“食神”係中山张溪人！

韜韜今次专门带咗马来西亚饮食商会有成70几人来石岐佬品尝地地道道嘅中山菜，个个都赞不绝口，食过番寻味！

中山美食游嘅主持（超哥、岐人张、骆威）仲同韜韜交流咗饮食心得！韜韜不单单识饮识食，仲懂得怎样烹饪美食，而且懂得每样食物的特质和天时地理嘅奇妙关系，最最佩服嘅仲係佢懂得其菜肴背后嘅文化，让人获益良多！韜韜甚至经常将一D煮食秘决、烹调方法讲俾大家知，佢话“俾更多人识得点样去煮好吃嘅菜係件有意义嘅事”！

韜韜见到“岐岐”几开心！仲握晒手仔添！

“岐岐”同韜韜一样都咁可爱！

Think、Pencohn / 图
Think / 文